Kommunikasjon

Resultat

Oppsummert vurderer vi den samla måloppnåinga som god i 2022.

Mål 1: Vi tilbyr effektive og brukarorienterte digitale tenester som gjer det lett å gjere rett

I 2022 varierte besøkstala på nettstadene til Digdir i begge retningar. Digdir.no hadde ein liten nedgang i besøk, men fekk ei ny, brukarorientert landingsside. Sidetreffa på altinn.no gjekk ned frå om lag 120 til 105 millionar, og brukarøktene gjekk ned med 12 prosent grunna at Skatteetaten har teke ut fleire tenester. Bruken av noreg.no gjekk ned med 10 prosent. Det høge talet i 2021 skuldast at kommunar ba alle over 65 år å sjekke kontaktinformasjonen sin i Kontakt- og reservasjonsregisteret via Noreg.no. Antall brukarøkter på hjelpesidene til ID-porten var også ein tredjedel lågare. Vi lanserte ein ny versjon av Prosjektveiviseren.

Uutilsynet.no auka trafikken med 35 prosent i 2021 og heile 50 prosent i 2022, mykje grunna den nye tilgjengelegheitserklæringa. Bruken av Samarbeidsportalen, som er viktig for brukarane av fellesløysingane, auka heile 40 prosent. Årsaka er at mange nye kundar kom til i 2022, og at meir redaksjonelt innhald førte til at eksisterande kundar brukte Samarbeidsportalen meir. Altinn digital er under avvikling og vert integrert i Samarbeidsportalen.

Mål 2: Vi når fleire for mindre gjennom arrangement brukarane har nytte av og er nøgde med

I 2002 var aktiviteten like høg og deltakarane like nøgde som i 2021. Digdir hadde 75 arrangement, mot 112 i 2021. Vi registrerte 8 843 påmeldte deltakarar i 2022, mot 7 895 i 2021. Det reelle talet er høgare begge åra sidan mange arrangement hadde open lenke. Ingen arrangement var kun fysiske.

Digitaliseringskonferansen hadde 805 deltakarar, som var mykje lågare enn i 2021 med 1457. Dette var ei trend i post-pandemiåret 2022. Brukarrådet var digitalt og hadde 1 335 deltakarar, som er langt høgare enn 973 året før.

Stadig fleire nyttar Teams til nettverksmøter og arrangement, og i mindre grad Vimeo. Sjølv om dei målbare strøymetala går ned, bidreg dei reelt sett til sterk meir- og etterbruk av arrangementa våre. Vi samarbeidde godt med DFØ om felles konferansesenter og studio.

Mål 3: Vi bruker kommunikasjon til å utvikle og profilere Digdir

Sjølv om medieomtalen var noko lågare enn i 2020, auka medieskåren og omtalen av Digdir som premissgivar sterkt i 2022. Den positive omtalen hadde langt større gjennomslag enn i 2020, medan den negative hadde mindre. Deling av data, informasjonssikkerheit og arbeidet med livshendingane, særleg dødsfall og arv, fekk mykje positiv omtale. Lokale media i Brønnøysund og Leikanger viste fram Digdir som attraktiv arbeidsgivar i mange oppslag. Uønska hendingar i ID-porten slår sterkt negativt ut på mediescoren.

Utvikling i medieskår frå 2020 til 2022

Medieomtale fordelt på Digdir sine fire roller

Digdir vurderte sin eigen bruk av Facebook og konkluderte med at vi kan og bør ha ei side på Facebook. Digdir delte vurderinga som ein del av rettleiinga for bruk av sosiale medium i forvaltninga. Vi auka talet på følgarar på alle sosiale medium. Vi har lagt ned stor innsats på LinkedIn, som vaks til 7 803 følgarar i etableringsåret 2020, 10 093 i 2021 og 14 725 i 2022. Facebook auka frå 1 493 følgarar i 2021 til 1 779 i 2022, Twitter frå 1 656 til 1 868, og Instagram frå 762 til 935 følgere. Vi publiserte 20 tekstlege blogginnlegg, videobloggar og podcastar på Digitaliseringsbloggen, mot 26 i 2021. Nyheitsbrevet hadde 8 987 abonnentar, 171 fleire enn i 2021.

Mål 4: Vi fremmer klart språk

I mai 2022 lanserte Digdir ei ny rettleiing for bruk av klart språk som prosessverktøy i utvikling av digitale tenester, i samarbeid med fagmiljøet for brukaroppleving i Digdir og som del av livshendinga dødsfall og arv. Retleiinga vekte stor interesse. Så langt har NAV, Skatteetaten og Origo Oslo kommune teke rettleiaren i bruk, og bachelorprogrammet Klart språk ved Universitetet i Oslo har teke den inn på pensumlista.

I 2022 har det viktige samarbeidet med Språkrådet og KS handla om felles klarspråksstand på Digitaliseringskonferansen 2022 og nettseminar om ulike klarspråkstema.

Utfordringar

Digdir har ikkje fått prioritert ein felles kanalstrategi som sikrar at brukarane våre opplever netteneste som heilskaplege. Altinn.no og norge.no står begge føre ei teknologisk fornying i 2023, men den framtidige rolla og potensialet til dei to noverande portalane for næringslivet og innbyggarane som del av arbeidet med samanhengande tenester, livshendingane og helskapleg informasjon er ikkje avklart.

I tråd med nye politiske signal frå ny regjering har Digdir redusert bruken av konsulenttenester på kommunikasjon. Det har auka presset på og krava til Digdir sine kommunikasjonsressursar, spesielt på produksjon av videoar, design og klart språk.

- "Det som er bra med å være lærling i Digdir, er at jeg blir faglig utfordret og får tillit til å utføre selvstendige oppgaver. Digdir som lærebedrift er fleksibel, raus og tar initiativ til at jeg får videreutvikle meg."

Mina Kanyarat Ngobudda (20), lærling i mediegrafikerfaget Oslo, kommunikasjonsavdelingen

Prioriteringar og tiltak

I 2023 vil vi jobbe med å finne svaret saman med andre på korleis det offentlege kan og skal kommunisere livshendingane på ein mest mogleg kostnadseffektiv, brukarorientert og heilskapleg måte, samstundes som vi må avklare kva rolle næringslivsportalen altinn.no og innbyggarportalen noreg.no skal spele framover.

Vi vil fortsette det målretta arbeidet med å styrke medieskåren generelt og Digdir som premissgivar på prioriterte område i samfunnsdebatten spesielt. Vi planlegg også å gjere ei risikovurdering (DPIA) av LinkedIn og Twitter i 2023.

Digdir vil fortsette å auke kjennskapen til og bruken av Digdir sitt samla tilbod i 2023, inkludert marknadsføringa av rettleiinga for klart språk, og vi vil knytte klart språk til prioriterte og relevante satsingar som livshendingane, brukskvalitet og heilskapleg informasjon.